// mulebelenga…

Imilandu ya mu 2011

Kabusha – May 2011

Ba Kabusha,

Bushe balya bashamfumu abaile tula Yesu ifyabupe fyabo lilya afyelwe, bushe bali ba mu mutundu nshi? Panuma ya kupakata umwana baile kwi, apo na kuli Herodi tababweleleko tabatweba noko bashokele; bushe ni kwi baile?

David K. Kaunda Mulenga na
Mulenga M. Bwalya – St. Joseph Mukasa Parish, Kitwe.

Mwe bantu bakwa Lesa, ilipusho lyenu lisuma nomba bane ifyo muli no kwishiba fyakuti, ifyo balemba mu Bible pali bashamfumu ni pa kushimika imbila ya musango twapokelelemo Umulubushi, ici e capamfishe Lesa. Fimbi ifyashala fya kulondolwelamo pakuti Cishinka eo eshibikwe bwino ukucilapo. Ukwishiba ukuti balya bantu balitulile ifyabupe no kufilumbula balifilumbula, twalishiba nefyo fyali no kubomba.

Elyo fimbi ifyashala ne ishila babwelelemo uko bafumine, te fya kutupususha nangu ukutulange nshila ya ku mulu nakalya. Uwa kukonka fye ni Cishinka uwaishile, nefyo atweba na lelo line; nga eo twalakonka ninshi twasumbila umulu.

Kabusha

 

Ba Kabusha,

Mwapoleni Mukwai. Twasukeni, bushe bapenda umubili wa ba Banda abati bateka imyaka ibili nangu bapenda finshi? Ba Banda e bapyene abayashi ba Mwanawasa; nomba apo bapyanina bushe imyaka imyaka isano (5) naipwa? Cinshi tukalavotela uno mwaka?

(twafisa amashina).

Mwe balembele ili lipusho, mukwai mwaipusha bwino. Ico twalasalila intungulushi na kateka, te mulandu wakutila ba Banda nabanaka ukuteka iyoo. Mulandu wakuti, mu Constitution ya Zambia, mwaliba icebo ca kusala intungulushi na kateka panuma ya myaka isano ukufuma apo ubuteko bulipo bwasalilwe. Kanshi na ifwe uno wine mwaka naciwama ukusala pantu imyaka isano apo ubu buteko bwabelako naipwa.

Nangu ba Banda abene tekuti batemwe ukusala na kabili, kwena icebo cilebapatikisha ukuti kufwile fye kwaba ukusala. Nga cakuti nacilinga, abantu abalebafwaya kuti babasala; abo abashilefwaya ukutila bakonkanyepo, bakabakana, uyu te mulandu iyoo; kuti abantu abene babafumyapo nga bamona ukuti tapali ifyo balecita. Nga imwe uko ku mwenu muletilapo shani? Bushe kuti mwababwesha pa butungulushi atemwa iyoo? Cili kuli imwe.

Kwena nga mwati mupendule imilimo babomba, kuti mwe bene mwaimwena. Ilingi kwena na imwe mwaba muno mwine. Ifwe kwena kano fye cikapitile kumbi, tatulefwaya ukubacita filya mwaishiba, fyena ni nkaama yesu. Nga mulefwaya ukumfwilapo na fimbi mukese mu polling booth, emo mukesa mwena. Ifi twalanda fili ni kuli cila muntu ifyo alefwaya ukwisa cita, nampo nga kuvotela ba………….a!

Kabusha

Ba Kabusha,

Kuno mwesu kuli namayo umo uucita umupatili nga lefunda, wena kusuusha fye fyonse ati: “Fya bufi alefunda, umwiine e wakwata akapatulula no lufyengo….etc”. Nga wati umwebe ati, bushe imwe kuti mwafunda ukucila apa?” Awe umuntu, te wakumfwa. Kanshi kuti twamweba shani?

Nine umwana wenu muli Kristu; ishina epo lili nomba twafisa.

Uyo muntu kuti cawama elaisa na mu ng’anda yakwa Lesa ilyo balefunda. Bu cakolwa ne misango iyalubana ifyo bamufungila ukupoka Ulukaristia, e fyamulenga ukuti abe ifyo. Umutima walimukalipa, kabili no mwine alishiba ukuti alisebana. Ala nga waigililamo ukunwa elyo ne misango iyo twafilwa ukulumbula, cinecine kuti bamwimika no kupoka Kristu mu Lukaristia.

Kwena pa kwimika umuntu ku Nsakramenta, ninshi calatwala mwi Shiku, pantu te lingi bemika abantu icimike imike iyoo. Kwena bonse tuli ba masambi, nomba umwenso no mucinshi nga fwapwa, walacita fye ne fyalubana pa lwalala, kuti cawama bakukaka fye mu myando. Apo tatwakwata insambu sha kukaka umuntu mu myando cawama ukukwiminika fye.

Nga cakuti bakwimika namgu umweshi umo, elyo nisnhi bakupela ne nshita ya kuya mu matololo ukuilengule we mwine, ukuipitlukamo pakuti ilya nshita nga yapwa, ukeseba umuntu umupya, uwakuushika kabili uwabuta umupashi. Kuti nga wapoka icilapilo, awe mukwai, niwe malaika. Mwe bantu bakwa Lesa, mulepilibuka! Muletina ifikali ilyo mucili abomi, inshita yenu nga yapwa, awe kukaba abulanda.

Kabusha

Ba Kabusha,

Mutule kuno eeh! Mukwai ndeipushako filya twasuka mwi Pasaka tutila “Ee Twakana” no kutila “Eeh twasumina”. Bushe cinshi tatusosela ukutila: Ee twakana shetani na Eeh twasumina Lesa Tata? ifi tusumina fye umuku umo, nangu ukukana fye umuku umo, tacawama.

Nine Joseph Chibemba – Immaculate Heart of Mary Parish, Kapiri Mposhi.

Ba Joseph, mukwai icipusho cenu caumfwika, no kwasuka twalayasuka. Filya tusosa atuti: Ee, twasumina nangu iyoo twakana, fyonse fili fye bwino, ukusumina kwena abengi balabwekeshapo na mu mitima yabo, te pakanwa fye peka epela iyoo. Na imwe muletila: Ee twakana, mulebwekeshapo na munda shenu amuti ifi nakana bushe nin’gumfwikisha umo nalosha?…

Fyonse ifyo tusosa mu mapepo, caliwama ukufingisha na mu mitima yesu. Uku e kupepa mu mutima na mu cishinka filya Yesu alandile ku mwanakashi umwina Samaria. pa cishima. Bonse nga tuli mu Church, umupatili aleshiba ukuti: fino ndepepa, na abakristiani baleilundamo ne fya munda shabo. Kanshi no kutekanya tuletekanye. Cibe ni pa kupoka Imfumu kuti we muntu na wemwine waibikamo, no tuli mu bongo bobe tonse.

Nga cakuti mulepepa ifi, awe mwandi, na kuli Lesa ninshi namufika, ne cilambu bane ninshi namukwata. Pantu mu Minsa tamwawama kwikala fye tondolo kwati uli mu tulo! Ala ni cila muntu elyo na bantu bonse pamo.

Kabusha

Mukwai amayanda ya bakapokola ayo bekalamo bushe balibashitisha? Ico twalandilefi ni ico amayanda ba- Police bekalamo tayamoneka bwino; ifili nga aya ku Chiwempala Police Post ku Chingola, yalyonaika nganshi. Naco nga tababashitisha, cinshi kushabela maintenance? Ala ca nsoni sana ukumona bakalinda wa mutende balefuma mu mayanda ayatobaika ne mitenge ya fipunda, ne fintu fimbipo. Tulelomba basoseleniko

Sebastian Banda – 5, Busumino Road, Chingola.

We mwaume Sebastian, te ku Chingola kweka iyoo, ni konse fye muno Zambia, konse uko bashitisha noko bashashitisha amayanda. Amayanda ayo bashitisha, yenakomo kumo yaliko bwino. Abene abashita baleesha ukusunga bwino, yambi yena lilya abantu bapwile fye ukushita, calipwila na palya pene; impiya sha maintenence shalibabula!

Nomba amayanda ayo bashashitisha yena mupamba, tekuti utile mwikala na ba-Officer ba buteko. Ne ng’anda iikalamo kabolala wa nsala yawamako. Bushe abantu nga baleikala umwa musango uyo, imibombele kuti yaba shani? Bushe kuti basunga umutende wa bantu banabo bwino? Kwena ni nakalya. Imibombele kuti ileba fye mufulo mufulo na cipyu cipyu kwati abantu e babalalika mu fiyanda ifyaonaika.

Neci cipyu cipwila mu ntungu shesu, kuti nga akwikata, ala kuti wapapa. Kuti nga akunyanta umunshele waumfwa ne filamba mu menso fyalaengelela.

Bushe muletontonkanya kapokola uufumine mu nganda ya musango uyo. kuti aumfwapo na luse? Te bakapokola beka, ni bonse abekala mu mayanda aya buteko yalya ayashashitishiwa.

Kwena nangu fye nine, tekuti ncite nangu cimo kuti nafumamo fye naya na ku yakusonkela iiliko bwino.

Ubuteko tukakwata, bulingile bukalolekeshe pa fipe fyonse ifya buteko, no mwikala abantuna ma- Office yene musango umo wine. Abalatalika bakese uleke nkabapishe mu ncende shonse nga tabafimona. Lelo kwena mulafimona, nomba mucita fye umumbo.

Kabusha

Ba Kabusha,

Bushe cinshi cabipa ukwipusha umuntu icilonganino abako? Ine naleyangala na banandi, elyo caisa mu mano nati, kambepushe icilonganino babako, twali abantu basano (5), awe uwa bumo no wa bubili, bayasuka fye bonse abati ni ku PF. Nomba lilya ndeya pa walenga batatu, nshilasosa no kusosa ne fyonga fyaima ati ulensetinga! Cinshi nalufyenye? Pa kulekelesha nasangile ukuti uwaimishe ifyongo wa MMD. Mukwai fundeniko.

Samson Shingobena – Shingobe Farm, Lusaka West.

Nga ni apo peka mune tapali na fintu walufyenye nakalya. Kwena icali no kucitika, iwe wine nga niwe wayambilepo ukuisokolola ku banobe, elyo panuma waipusha abashala. Nalimo ni nsoni nangu umwenso umunobe akwete, limbi uko ku ncende mwali abafulako aba Party imbi te ya MMD. Kanshi umunenu ica atile mu mutima wakwe kuti mwalamutumfya. Kwena ukuba mu cilonganino ca MMD te cilubo nakalya.

Abantu bamo babula ifyaba mu bantu abengi efyo nabo baitwika. Eko baba ba MMD bamo abafuuka nganshi, nangu kwena banono, lelo eko bali. Tacipilibula ukuti aba bantu bena babi, awe mwandi basuma nganshi, lelo ababa nga uyo umunobe bena tabawama nakalya. E basebanya ne cilonganino, baleta no lubola lwe shina ku bantu balatila ba MMD balubuli. Awe, te bonse iyoo.

Bonse fye mwe ba MMD tapaba ne cintu mwabifya, mwaba fye bwino. Kabili nga umuntu alefwaya kuti afumamo aya nakumbi. Ku ncende kumbi ba MMD e bafula, lelo tababa umusango umo, iyoo. Abengi, basuma nganshi, abanono e babipa, baba nga William wa ku Lusaka, abalubuli. Abantu bamusango uyu e bakalenga no kuti MMD ikesebobela uno mwaka.

Kabusha

Icishibisho

Mwe bakabelenga wesu bonse

Mukwai twamilomba ukulatuma amepusho yenu yonse aya kuli baKabusha kuno kwipepala lya Icengelo Magazine pali aka akeyala:

BaKabusha,
Icengelo Magazine,
P.O. Box 71581,
Ndola, Zambia

Ukulandapo

Takulati kube ifyakulandapo.

Landenipo